Balatkar… Manav jaati ki sabse bhayanak aur sharmsaar kar dene wala kritya. Aur yahi kritya ek culture ban kar humare samaj ka hissa banta jaa raha hai. Aur mai aisa isliye keh raha hoon kyunki balatkaar ke kanoon mein kami aur har roz badhte rape cases iss baat ki gawahi dete hain. Hathras me aisi hi ek jaghanya apradh ko anjaam diya gaya hai. Aaiye jante hain Hathras Rape case me akhir kya hua tha.
Hathras Rape Case
Hathras Uttar Pradesh ki ek jagah jo Delhi se karib 200 km ki doori par hai. 14 september ko ek 19 saal ki yuvati ke sath bhayaavah ghatna hui. Aarop hai ki 4 yuvakon ne uske sath maarpeet ki aur gangrape bhi kiya gaya. Uski haddiyan tod di gayi aur jeebh kaat di gayi. Ek yuvati ke sath is hadd tak ki bhayaanak ghatna hone ke baawjood bhi wahi hua jo desh ke aur bhi kai malli mein hota aaya hai. Iss ghatna ki koi sunwaai nahi ki gayi.
Kaise Diya Gaya Ghatna ko Anjaam
Rape pidita ke bhai ne media ko puri baat batai. Bataya gaya ki yuvati aur uski maa ghass lekar laut rahe the, tabhi 4 ladkon ne yuvati ko dupatte se khich liya aur use ghaseet-te huye khet ki taraf le gaye. Wahan uske sath maarpeet ki aur gangrape ko anjaam diya gaya.
Jab maa ko pta chal ki unke pichhe unki beti nahi hai, to wah khet ki taraf aage badhi. Aage ja kar unhe apni beti ke kaan ke kundal Aur chappal dikhai diye. Yah dekhne ke baad maa chillane lagi aur shor sun kar wah 4 ladke yuvati ko khet mein chhor kar bhag nikle.
Chaaron aropiyon ka naam Sanjeev, Rajkumar, Lavkush aur Ravi bataya gaya hai.
Iss bhayanak ghatna ke baad ladki ke gharwalo ne police se iski shikaayat ki. Lekin police ne isey koi case maanne se inkaar kar diya. Gharwalon ne btaya ki police ne case file karne me 7 din ka waqt lagaya.
UP Police Ka Gundaraj
Itna sab kuch hone ke baad jab police ne case darz kiya to sirf ek aaropi ko pakda gaya aur dusre ko chhor diya gaya.
Gangrape ka mamla darz hone ke kai din baad police ne mana kar diya ki yuvati ke sath dushkarm hua hai.
Peedita ke gharwalo ka kehna hai ki uska ilaaj ache hospital me nahi karaya gaaya. Jab haalat itni nazuk thi aur wah ghanton tak behosh thi tab bhi usey 11 dino tak JN Medical College, Hathras me hi rakha gaya tha.
Lekin jab problem badhne lagi to samaj ke logon ne AIIMS mein bharti karaane ki maang ki. Parivar bhi yahi chahta tha lekin yuvati ko AIIMS ki bajaye Safdarajung Hospital mein bharti karaya gaya.
Kareeb 13 din baad Hathras Rape ki ghatna saamne aayi aur social media mein viral hone ke baad desh bhar se pratikriyaaein milne lagi. Celebrities se le kar netaaon me bhi kaafi gussa dekhne ko mila.
Itna sab kuch hone ke baad bhi UP police yahan tak nahi ruki. UP Police ne yuvati ke shav ko kareeb raat ke dhai baje ek sunsaan jagah jala diya. Parivar ne kaha ki aisa karte waqt unhe kamre me band kar diya gaya tha. Logon mein yah dekh kar aakrosh aur bhi badh gaya. Har jagah UP sarkar aur Police ke bare me log likhne lage aur virodh kiya. Jaanch ke liye ek SIT ka bhi gathan kiya gaya hai.
Badhta Rape Culture
Rape ke mamlon me badhti ginti ko dekhte huye kam se kam yah kaha jaa sakta hai ki iss tarah ke jurm ki kadi se kadi saza honi chahiye. Taaki koi bhi insaan iss tarah ke ghinaune kritya ko karne se pehle hazar baar soche. Aur mujrim ki rooh tak kaanp jaye.
Humare desh mein iss tarah ki ghatnaon ka aam hona humare liye sharmindagi se alag kuch aur nahi hai.
Apko humara article kaisa laga hume comment kar ke zaroor batayein. Aisi hi Desh aur Duniya ki khabarein paane ke liye humse jude rahein.
Dhanyawad!
