Sreesanth Fir Se Khel Sakenge Cricket, Khatam Hua 7 Saal Ka Ban

Hindustan ke naami tez gendbaaz S.Sreesanth ko to aap jante hi honge. IPL me spot-fixing ki wajah se unke upar ban lag gaya tha. Pehle to aajeevan pratibandh ka faisla sunaya gaya tha. Lekin Sreesanth ne iske khilaf supreme court mein ladai ladi aur unka ban saat saal ka kar diya gaya. 13 September ko unka yahi ban khatam hua. Unhone kaha bhi tha ki wo pratibandh hatne ke baad khelna shuru kar denge.

Ban Ke Baad

Sreesanth ne apni khushi zahir karte huye bataya ki unhe azadi mil gayi hai. Ab wo rahat ki saans lenge. Unhone yah bhi kaha ki kaafi lambe intzar ke baad ab unka khelna fir se shuru ho sakta hai. Par abhi CoronaVirus ki wajah se kahin bhi game nahi ho raha hai. Unhone aage bataya ki unhone ek local tournament karane ki bhi sochi thi, lekin safety ko dhyan me rakhte huye isey postpone kar diya gaya hai.

Sreesanth batate hain ki May-19 se unhone apni training me dil aur jaan laga di thi. Aur jab unhe lagta hai ki is season koi game nhi ho payega to wo toot jate hain. Lekin yah bhi sochte hain ki aisa karke wah khud ke sath insaaf nahi krenge.

Purey josh ke sath Sreesanth

37 varshiy Sreesanth ne tweet karke kaha ki ab wah wo khel khelna chahte hain jisey wah sabse zyada pyaar karte hain. Unhone yah bhi sunishchit kiya ki wah har ball me jaan laga denge chahe wo practice match hi kyu na ho. Yah bhi bataya ki unke andar abhi bhi 5-7 saal ka cricket bacha hai aur wo jis team ke liye bhi khelenge wah apna best denge.

Sreesanth ne yah tweet 10 September ko kiya tha aur aage unhone bataya ki wah kabhi cheating nahin karenge fir chahe wo ek friendly match hi kyun na ho. Na hi wah aasan balling karenge aur na hi haarne ki koshish.

Corona se affect hua Cricket

Bhartiya Gharelu Cricket pe corona ka kaafi bura asar pada hai. August mahine tak shuru ho jane wale saare cricket matches ko aage ke liye taal diya gaya hai. Ab yah kab hoga iski koi guarantee nahi hai. Sreesanth ki ichcha thi ki wah Kerala ki team se khelein, ab dekhna yah hai ki unhe iss team se khelne ka mauka milta hai ya nahi.

Sreedanth Ka Pratibandh

August 2013 mein Board of Control for Cricket in India ne Sreesanth par ban laga diya tha. Us waqt wah IPL mein Rajasthan Royals ke liye khelte the. Sreesanth ka yah case kaafi waqt court mein raha. Gaurtalab hai ki spot-fixing mein kuch saabit nahin ho saka aur iss bich Sreesanth khud ko nirdosh batate rahey. Lekin in sabhi vivadon ke karan unka cricket career khatm ho gaya.

Supreme Court Se Mili Rahat

Sreesanth apne upar lage pratibandh hatane ke liye Supreme Court chale gaye. Supreme Court ne 2019 mein BCCI ko kaha ki wah Sreesanth ke upar lage ban ko kam karne par vichar dey. Iske kuch samay pashchat BCCI ne ban ka samay ghata kar 7 varsh kar diya.

Sreesanth ne Bharat ke liye 53 one day mein 75 wicket liye hain aur 27 tests mein 87. Aur sath hi T20 format mein bhi 10 matches mein unke naam 7 wickets hain.

Ab dekhna yah hai Sreesanth Indian Cricket mein kis tarah ki waapsi karte hain aur unki fitness kis tarah ki rehti hai.

Jaanne ke liye judey rahein Ghoomantar se…..